« تَهاری آنی پـُسّـَگ » و « قرنانی قهریں ڈُکّ »
« تَهاری آنی پـُسّـَگ » و « قرنانی قهریں ڈُکّ »
چاپ و شنگ بیت انت !
واجه منیر احمد بادینی ءِ دو کتاب « تَهاری آنی پـُسّـَگ » و « قرنانی قهریں ڈُکّ » همے زیتاں چه بلوچی اکیڈمی _ کوئٹه ءِ نیمگ ءَ چاپ و شنگ بیت و نهادی ءَ آتک انت !
واجه منیر احمد بادینی ءِ ند و قلم بلوچی زبان ءِ دیمبری ءَ چد و پیش بازیں کتابے نبشتگ و پیش کتگ و گوں هر کتابے ءَ ، آئی ءِ ند ءِ شیرکنی و پهته کاری و سوهوی گیش بیتگ و گیش بیان انت . امیت انت که آئی ءِ ند مدام پر زیمل و پر زیمر بات و بلوچ زندمان و ناولانی نداره کشّی ءَ پر وس و واک به بیت .
2010 ءِ سال امیت انت که په بلوچاں و بلوچی زبان نیکیں سالے به بات و بلوچی کتابانی لڑ که اے سال ءَ چاپ و درکپان انت ، هر روچ و هر دمان ءَ دراج و دراجتر بات !
دگه گپے که دلگوش کنگی انت ایش انت که ما را تا هنون بلوچی لبزانکے په بلوچ راج ءِ چـُک و اوبادگاں نیست . ابید چه « درونت » ءِ مهتاک که په براه درکپان انت ، و چیزے "مولت فلم " که باز جوانی و په استادی ءَ ترینگ بیتگ انت ، کتابی داب ءَ ، کمتر چیزے دست کپیت . جوان انت که اے نیمگ ءَ دلگوش گـُوَر کنگ به بیت . « بلوچی زهگ بلد » و « بلوچی آب » ءِ دابیں کتاب پیکه گیشتر چاپ و شنگ به بنت . بلوچی لبزانکی کارگـَلّ و ادارهانی زمه انت که اے نیمگ ءَ گیشتر دلگوش کننت .
سبز و پر براه بات بلوچی دیوان !
« پهره روتاک »
