هنکین

 

هنکین؛

گامگیج؛

شوهاز؛

بُن ریشگ؛

سوبمندی ءِ نُقرهین کورَگ ءِ؛

تلاهبندین سر سنگ اَنت.

پمیشکا :

متاه کرز اَنت اے جار مڑاهانی:

هنکین منی؛

هنکین تئی؛

بیا که پدا

یک رندے دگر

پدریچان وتی مهریز کنین.

ءُ

گامگیج منی؛

گامگیج تئی؛

بیا که پدا

یک رندے دگر

گامگیجان وتی تیز کنین.

ءُ

شوهاز منی؛

شوهاز تئی؛

بیا که پدا

یک رندے دگر

شوهازان وتی باز کنین.

ءُ

ریشگ منی؛

ریشگ تئی؛

بیا که پدا

یک رندے دگر

بُن ریشگان همباز کنین.

 

هنکین؛

گامگیج؛

شوهاز؛

بُن ریشگ؛

مهرانی باندات ءِ نقرهین بامگواه ءِ

تلاهبندین روچ ٹِک اَنت.

پمیشکا،

متاه کرز اَنت اے جار مڑاهانی.