(تاريخي. فرهنگی.علمی. اجتماعی.ادبي.خبری)

روچتاک توارءَ شنگ بیتگیں حالےءَ داتگ کہ مغربی بلوچستانءِ نامداریں ندکار، حالکار و قومی حقانءِ پھازگا جھدکنوکین شھید یعقوب مھرنھادءِ شھادتءِ سالروچءِ ردا بی إس او -آزاد تمپ ھنکینا 4 آگستءَ دیوانے برجم داشت۔

ماں بالیچہ برجم داشتگیں پچیں دیوانءِ پاگواجھی صدام أبیتک کت و خاصیں مھمان بی إس اوءِ بنجاھی کمیٹیءِ باسک بیبگر بلوچ أت۔ تنظیمءِ پیسری جھدکار نصیر گچکی و ھندی سروک غلام مصطفا ھم دیوانا نندوک إتنت۔ دیوانءِ جارچینیءِ ذمواری صدام بشیرءَ وتی گوپگان زرتگ إتنت۔

رستگیں حالانءِ ردا مشرق و مغربی بلوچستانءِ شھیدانءِ ستایا نبشتہ و چپ چاگردا پرلچینتگیں دانکاں دیوانجاہ سمبهینتگ أت۔ ھر نیمگا بلوچستان و بی إس اوءِ بیرق ھم ٹال إتنت۔

شھید یعقوب مھرنھادءِ داتگیں قربانیاں ستا دیگءِ ردا گشگ بوت کہ آ بلوچستانءِ آزادیا لوٹوکیں یک ندکار و حالکارے أت۔ آئی 27 أپریل 2007ءَ إیرانی گجر فوجا دستگیر کت و پدا 4 آگست 2008ءَ پاھوا درتک إش۔

گوں دیوانا گپ جنوکاں دیمترا درّائینت کہ زورگر بہ زان أنت کہ چکانپگ، لٹ کٹ و درنجگءِ ناروائیں کارکردانءِ سببا آزادیءِ جُنز مھتل کنگ نہ بیت۔ إے ڈولیں کارکرد بلوچ اُستمانءِ دلاں زورگرانءِ خلافا هستیں نفرتا أنگت گيئش کن أنت۔ ھمے برکتا بلوچ پہ گيئشتر قربانی دیگا ساڑی إبنت۔

تران کنوکیں راھشوناں گشت کہ پہ بلوچستانءِ آزادیا خون دیگ ضروری إنت۔ پمیشا بلوچ پہ وتی ماتیں سرڈگارا خوناں ریچگا أنت۔ آواں گشت کہ مشرقی و مغربی بلوچانءِ ھوریا جؤڑ بیوکیں 'آزاد بلوچستان کونسل' لایق ستا إنت و ھنوگیں جاوراں سک ضرور إنت۔